‎ادارة الازمات بالنهج الاستباقي

‎تكلمت في وقت سابق حول اسرار النجاح اللي هي التخطيط والمتابعة

‎اليوم نريد نعرف شنو يعني ازمات

‎الكثير عرفوا الازمة

‎لكن تعريفي البسيط الها ومو بس التعريف راح اتحدث عنها بشكل عام بطريقة مبسطة ومفهوم مختلف

‎خطأ او سلسلة اخطاء داخلية متراكمة او تهديد خارجي, يحدث بشكل غير متوقع يصل بالشركة الى نقطة مفصلية قد تؤدي الى اغلاقها

‎اليوم الاسلوب المتبع بشكل عام في بلدنا الحبيب لادارة الازمات هو الارتجال, وهذا الشي مو خطأ لكن هو نوع من المجازفة بنسبة خطر عالية

‎احد خبراء ادارة الازمات كال الشركات اللي ترتجل الحلول تكون معرضة للخطر لكن الشركات اللي تعتمد النظام الهرمي تكون اكثر رصانة واني أؤيد هذه الفكرة وهسه راح اكلكم شلون

‎الفكر الاساسي من ادارة الازمات هو الاستباق, يعني نحاول نكتشف دائما الخلل قبل ما يحدث, طيب هنا الكل راح يسأل شلون نسوي هذا الشي, راح ارجع وياكم الى موضوع التخطيط والمتابعة لكن راح اضيف مصطلح بسيط جدا اللي هو المراجعة, كل شركة تعمل بشكل احترافي يجب ان تضع خطة سنوية ابتداءا, وحتى تبقى هاي الشركة مسيطرة لازم يكون عدهم شي اسمه مراجعة, المراجعة بشكل اساسي لازم تحدث شهريا على اقل تقدير, لكن ممكن تكون اسبوعية ما بين الادارة المتوسطة, وشهرية ويه الادارة العليا.

‎شنو الهدف من المراجعة؟ بكل بساطة لما نخلي الخطة السنوية راح نخلي اهداف ونخلي توقعات ونخلي خطة عمل لعلاج المشاكل الموجودة فعليا ومشخصة, بالمراجعة راح نتابع ونشوف حققنا الاهداف لو لا؟ وشكد نسبة انحرافنا عن الهدف؟ هل وصلنا للتوقعات لو لا؟ وشنو الاسباب؟ هل تم وضع الحلول والعلاجات للمشاكل الحالية؟ هل استجدت مشاكل جديدة؟ بشكل عام الخطة مالتنا حالفها النجاح لو فشلت وشكد النسبة؟ واذا اضطر الامر يتم اعادة عمل الخطة بشكل جزئي بعد اول شهر وممكن تتغير بالكامل بعد الربع الاول من السنة.

‎لذلك النصيحة الدائمة لجميع الشركات بشكل عام, والشركات الكبيرة بشكل خاص يجب ان يتم وضع سياقات ثابتة للعمل, وضع خطط, مراجعتها, متابعة الحلول, البحث المستمر, وكذلك توزيع الادوار بالشكل الصحيح, لان كل موظف من درجته الوظيفية اله نظرة ما يمتلكها غيره من مستوى اخر عالاقل, لذلك لازم ناخذ بنظر الاعتبار اراء الجميع.

‎وبهذه الطريقة راح نكون عملنا بطريقة الاستباق وراح نتحاشى الازمات, او عالاقل راح نستشعرها قبل حدوثها ونكون جهزنا الحلول بطريقة مدروسة وصحيحة.

#غياث_دحام #غير_نمط_حياتك #تسويق_بالعراقي #العراق #بغداد #اقتصاد #سياسة #تجارة #سوق #اعلان #ترويج #دعاية #تحليل #بحوث #مبيعات #ريادة_اعمال #اموال #اعمال #مشاريع #تخطيط #مشاهيرالعراق